Час Адвэнту, які ўжо падыходзіць да завяршэння, для дзяцей асацыюецца найчасцей з раннім абуджэннем, каб удзельнічаць у раратняй святой Імшы. Да ўдзелу ў такой Імшы дзяцей з гродзенскай парафіі Найсвяцейшага Адкупіцеля (Дзевятоўка) не трэба было змушаць.

Сапраўды на працягу ўсяго Адвэнту святыня з самага ранку была напоўнена дзецьмі, якія прыходзілі, каб разам з Марыяй чакаць нараджэння Божага Сына.

Сёлетнія Рараты былі выключнымі, бо падчас іх дзеці знаёміліся з гісторыяй сваёй парафіяльнай супольнасці, якая ў гэтым годзе адзначала 25-годдзе існавання.

Кожны дзень дзеці даведваліся аб тым, што ёсць у іх парафіяльнай святыні і для чаго яно служыць. Таксама яны пазнаёміліся з гісторыяй будаўніцтва спачатку капліцы, потым парафіяльнага касцёла, які многіх захапляе сваёй сучаснасцю і арыгінальнасцю.

Гэтая ідэя была задумана мясцовымі душпастырамі – айцамі рэдэмптарыстамі, сёстрамі назарэтанкамі і катэхетамі. Мэтай было дапамагчы дзецям адчуваць прыналежнасць да сваёй парафіяльнай супольнасці, а таксама ствараць у ёй адпаведную атмасферу.

Кс. Юрый Марціновіч
Фота: Галіна Валюшка

Паводле grodnensis.by